Jæja!! Maður verður nú bara að skammast sín. Hef ekki nennt að skrifa hér inn á þetta blogg ég veit ekki hvað lengi. En núna hef ég fréttir og þá er gaman að blogga.

Ég er farin að vinna aftur í Fjarðarkaupum og er að vinna allan daginn, virka daga. Ætla ekki að vinna um helgar í sumar og svo sé ég til hvernig ég vinn í vetur. Þetta eru þvílík viðbrigði frá því að vera bara heima með Hannesi Hauki, að vera að vinna allan daginn. En svona er þetta, maður getur ekki verið heima endalaust.

Hannes Haukur er í pössun hjá frænku sinni og ömmu sinni á morgnanna og svo eru þeir feðgar saman eftir hádegi þannig að þetta er bara fínt fyrir hann. Við ætluðum að setja hann til dagmömmu en það er bara orðið svo dýrt að maður bara hefur ekki efni á því. En vonandi kemst hann sem fyrst inn á leikskóla því þá þarf ekki að vera að fara inn í Reykjavík með hann á morgnanna því frænka hans býr þar.

Svo vorum við að fá okkur kött!! Já við af öllum:) Hann heitir Rasmus og er eins árs og voða ljúfur köttur og góður. Barngóður og er ekkert að fara með klærnar í HH en þeir eru voða mikið að leika sér eitthvað saman og bralla.

Ég gafst upp á hlaupaprógramminu eins og öllu öðru sem ég tek mér fyrir hendur. Þetta byrjaði voða vel og ég var alveg á því að halda áfram en svo bara datt ég niður í eitthvað "nenni þessu ekki" kjaftæði eins og ég geri oft/alltaf og er því hætt. En núna langar mig svo að gera eitthvað en þá hef ég bara ekki tíma út af vinnunni og svo er ég bara búin eftir daginn þegar ég kem heim. Kannski að maður reyni að koma sér eitthvað út úr húsi á kvöldin þegar HH er sofnaður í staðinn fyrir að leggjast fyrir framan sjónvarpið og sofna þar.

Hannes Haukur er bara flottur strákur og ég verð nú að monta mig aðeins. Hann er farinn að skríða eins og hann á að gera;) með báða fætur fyrir aftan sig og svo er hann farinn að geta staðið upp næstum því alls staðar og labbar með og í gær þá sleppti hann og stóð alveg sjálfur í nokkrar sekúntur;) en þetta er þó byrjunin. Hann borðar eins og fullorðinn maður liggur við, er svo duglegur að borða og fær núna að drekka hjá mér á morgnanna og kvöldin en annars fær hann vatn og fjörmjólk að drekka á daginn. Við erum farin að gefa honum það sama og við borðum á kvöldin, svona ef það er ekki of mikið kryddað og unnið og þá fær hann mat sem ég á tilbúinn handa honum inni í frysti. Það eru ekki mörg orð komin hjá honum, hann kemst ansi langt á uhh-inu sem hann notar eiginlega um allt.  En hann segir namm, namm og stundum mamma. Svo er það aah um dýrin en þá á hann að vera góður við þau. Aa eða taa er takk þegar hann er að rétta manni eitthvað. Svo dansar hann og syngur þegar hann heyrir í tónlist eða útvarpi. Hann klappar fyrir sjálfum sér ef honum finnst hann hafa verið duglegur. Hann er bara æði;) og ég er svo stolt af honum og elska hann.

En ég ætla þá ekki að hafa þetta lengra, bara nokkuð gott hjá mér;) Kv. María.

Hæ, hæ.

Það er nú ekki hægt að segja að ég sé að standa mig í þessu bloggi mínu. En maður reynir að henda inn færslum af og til, sérstaklega ef það er eitthvað fréttnæmt.

Við Hannes Haukur fórum norður í Hrísey á föstudaginn og erum búin að vera í góðu yfirlæti hjá mömmu og pabba/ ömmu og afa síðan þá. Á laugardaginn fórum við öll; ég, Hannes Haukur, mamma, pabbi, Narfi Freyr, amma, Svana, Agla og Bára á kaffihúsamessu í Sæborg sem var alveg rosalega skemmtileg. Þetta var kór frá Vestmannaeyjum sem var að syngja og þetta var bara svona afslappað og skemmtilegt, vöfflur og kaffi og sungið og klappað og haft gaman. Við vorum bara róleg hér heima á Hvítasunnudag en í gær, annan í Hvítasunnu, fórum við í sveitaferð í Bárðardalinn og heimsóttum Diku og Óla á Bjarnarstöðum og fengum að sjá litlu lömbin og kálfana. Hannesi Hauki fannst þetta voðalega spennandi en var náttúrulega ekkert að fatta hvað þetta var. Fannst þetta bara vera eitthvað sem hann ætti að vera góður við af því hann var alltaf að segja "aaa":)

Við höfum það annars bara mjög gott. Hannes Haukur dafnar hér hjá afa sínum og ömmu og finnst frábært að hafa einhvern svona til að stjana við sig. Hann "skríður" hér um allt og er farinn að gera tilraunir við það að standa upp við stofuborðið en það vantar ennþá herslumuninn á að það hafist.

Sendi bara góðar kveðjur til allra, kær kveðja María.

...en páskarnir eru búnir og vor og sumar bara á næsta leyti!! Sonur minn heldur bara áfram að stækka og stækka og er orðinn 8 mánaða gamall. Hann er svo duglegur og núna er það nýjasta hjá honum að veifa og segja, eða reyna að segja, bless bless:) Hann kann að sýna hvað hann er stór og sterkur og svo réttir hann upp hendina til þess að sýna hvað hann vill fá. Bara algjör engill.

Við Sunna erum ennþá duglegar í hlaupaprógramminu en tókum smá pásu um páskana en byrjuðum samt aftur kl. 9 á annan í páskum. GO við:)!! Í gær ákvað ég svo að byrja á því að skrifa matardagbók og komst að því að ég er ekki að borða nógu hollan mat. Verð að taka mig á í því.

Á mánudagskvöldið fór ég í bíó með Narfa Frey en hann var hér fyrir sunnan um páskanna. Við fórum að sjá Semi Pro og þvílík vitleysa!! Gat samt alveg hlegið smá en þetta er svona mynd fyrir hans aldur frekar en minn. Ég meina, það eru 10 ár á milli okkar, hann er bara rétt að verða tvítugur í haust en ég að verða 30!!! Smekkur manns breytist nú á 10 árum.

Læt þetta duga núna, kveðja María.

Hæ, hæ. Já ég ákvað að búa mér til nýtt blogg, var hjá blogcentral.is, þar sem að mér líkuðu ekki breytingarnar sem gerðar voru þar. Vona bara að þetta blogg eigi eftir að reynast mér vel. Á hinni síðunni var ég nú ekki neitt voðalega dugleg að skrifa inn færslur en margt hefur drifið á daga mína frá síðustu færslu.

Hannes Haukur er að verða 8 mánaða gamall og er orðinn 8.5kg!!! og 69 cm!! Ekkert smá sem hann rifnar út hjá okkur. Hann tók líka þennan þvílíka kipp í vexti þegar ég byrjaði að gefa honum að borða með brjóstamjólkinni. Núna er hann farinn að fá graut, ávexti; banana, epli, vínber, melónu og grænmeti eins og brokkólí og blómkál og sætar kartöflur og gulrætur. Einnig er hann farinn að fá fisk og eitthvað aðeins kjöt en við erum bara rétt að byrja að gefa honum það. Svo er hann farinn að sitja einn og veltir sér út um allt gólf. Hann er blaðrandi allan daginn og liggur við ný hljóð að koma á hverjum degi. Hann er bara algjör gullmoli og ég elska hann svo mikið og er svo stolt af honum.

Af okkur skötuhjúunum er það að frétta að það er eiginlega ekkert nýtt búið að gerast hjá okkur!!:) Okkar líf heldur bara áfram í sömu skorðum en það er Hannes Haukur sem er sífellt að koma með eitthvað nýtt. Ég er að vísu farinn að hreyfa mig meira. Ég fer út á göngu með Sunnu vinkonu og núna erum við byrjaðar á hlaupaprógrammi og ætlum að reyna að koma okkur í form fyrir sumarið. Óli fékk gullúr á nýafstaðinni árshátíð hjá Bykó sem verðlaun/virðinarvottur fyrir að vera búinn að vera starfsmaður hjá þeim í 10 ár. Árshátíðin var annars mjög skemmtileg og skemmtum við okkur mjög vel.

Ég held að þetta sé bara fínt hjá mér svona í fyrstu færslu. Sjáumst síðar, kveðja

María.